اد ايه صعب انك تكون موهوب
و الناس بتؤد حلمك..و حلمك اكيد بيموت
و تصبح احلامك شوية كوابيس
و مهما يكون على لسانك مليون كلمة..بتلتزم السكوت
هتقول ايه و انت شايف حلمك بيضيع من بين ايديك
و شايف كل كلمة كتبتها بتتحرق قدام عنيك
هتلاقى نفسك بتتمنى ان الارض تنشق و تبلعك
صعب انك تشوف حلمك بيودعك
و كل دمعة زمان اتحملتها هتلاقيها فى ثانية بتجرى من عنيك
و كل هم شيلته زمان..هتشيله دلوقتى من عليك
كفاية هم حلمك اللى ادفن فى التراب
كفاية ان اتقفل فى وشك الباب
كانك خدت مليون ألم على وشك
و هتحس انك ضايع..ماخلاص ضاع حلمك
يعنى خلاص اقول لقلمى ماتكتبش حاجة تانى
و اقطع كل ورقى و ارمى كل اقلامى
طيب لما اتخدع او اتهان تانى
اروح لمين..معنديش غير اوراقى
هى دى اللى بحكيلها و بفضفضلها
و برتاح اوى و انا نايمة فى حضنها
علشان بتسمحلى اكتب على كل سطر فيها
حتى دمعى بتستحمله و بتشيله بين ايديها
يبقى ازاى اسيبها و اخون وعدى ليها
ده مابيهونش حتى عليا ارمى قلمى اللى حبره راح
ده ياما شال من عليا دموع و عذاب و جراح
يبقى ارميه كدة فى ثانية من غير حتى ماقول سلام
ده بيفهمنى من غير حتى ماكتب الكلام
مستحيل ابيعهم دول بالغالى اشترونى
وقت ماكان اغلى الناس بالرخيص بيبعونى
و قت ماكان دمعى بيألمنى و الألم باين فى دموعى
فى ثانية حاسوا بجرحى و فى ثانية فهمونى
و ان كان حلمى فى مرة ضاع
فالغلط غلطى..انا اللى سيبته يتباع
يمكن وريته لناس مبتقدرش معنى الأحلام
مش عارفين يعنى ايه ورقة و قلم و كلام
و مش معنى انى حلمى إتوأد..انى انا كمان هاموت
بكرة حلمى من تانى يتولد..و اتكلم بعد السكوت
هايله
ردحذفميرسى كتيييييييييييييير :)))))
ردحذف