فى كل بلاد العالم فى حاجة اسمها "الويك إند" طبعا اللى هو عندنا يوم الجمعة، فى بلاد عندها يوم الأحد و فى يوم السبت و فى بلاد فيها سبت و أحد، أى كان المهم كل بشر العالم و البنى أدمين اللى عايشين على وجه الكرة الأرضية ليهم إجازة .. إلا إحنا !!! إيوة إلا إحنا، أحنا بسم الله ماشاء الله عندنا أكتر يوم مشغولين فيه يوم الجمعة !!!!!! أه بجد دوروا كويس كدة هتلاقوه كله مشغول يا أما فى درسين ورا بعض، أو شيفت "وردية يعنى"، أو مسافر مش عارفة فين عنده مأمورية، أو رايحة تجيب أبصر أيه ورق و حاجات عشان شغل بكرة!! أى حاجة ليها علاقة بالشغل و الدراسة و المذاكرة...
المفروض يا جماعة "الويك إند" ده يبقى راحة تاااااامة عشان نبدأ أسبوع جديد فرش كدة و مبسوطين، و نشيل كل هم الشغل و المذاكرة لمدة 24 ساعة بس، عشان نقدر نواصل و ننجح و نركز .. مشكلتنا إننا معنداش الثقافة دى اللى هى "ثقافة الويك إند"
مافيش مشكلة لو كل واحد خد بعضه كدة و راح لحد من أهله يقضى اليوم معاه، أو يسافر لـ مكان قريب يغير جو، أو يطلع رحلة مع صحابه، أو ياخد ولاده و يتغدوا بره، أو حتى يجيب الاهرام أو اخبار النجوم و كباية شاى و يعقد فى البلكونة يشم هوا...
المهم مانشغلش دماغنا و نحط نفسنا فى ضغط طول الوقت و طول الأسبوع ، هو الشعب جالو السكر من شوية!
بجد نفسى يكون عندنا الثقافة دى، نفسى كمان نكون بنعرف إزاى نقضى الويك إند بتاعنا، إزاى نغير جو و إزاى نبدأ أسبوع جديد بإشراقة جديدة و روح جميلة مفرفشة منعنشة.
جربوا مرة كدة تعملوا حاجة مختلفة و لو مرة واحدة .. مش شرط كل اسبوع، و شوفوا هتحسوا بإيه، جرب كدة تلغى الدروس اللى عندك و كأنك عيان "اعمل نفسك ميت" و روح أخرج مع صحابك دى أجازتك انت حر، جربى تلغى أم المشاوير و الشغل اللى عندك ده و جمعى عيلتك على الفطار الجامد ده بتاع يوم الجمعة (فول و طعمية و بتجان مقلى و فلفل مقلى برضو و بطاطس و كل الحاجات دى) و بعد كدة اتفرجوا على فيلم مع بعض، جرب تاخد ولادك عند قرايب ليك بقالك كتييييييير اوى ماشوفتهمش، جربى تخرجى انتى و أصحابك و تروحوا تاكلوا سوشى!! جربى يمكن يطلع حلو و لو طلع وحش ابدأى ألش انتى وصاحبك بقى و للصبح، بلاااااااش كل ده..
إنزل ميدان التحرير إعملك مظاهرة ولا إضراب أكيد يعنى هتلاقى حاجة تعترض عليها...
مش هاقولك بقى العمر ده هتعيشوا مرة واحدة و عيش يومك و كأنو اخر يوم و الكلام ده..
هاقولك بلاش تضيع فرصة ممكن ماتتعوضش تانى، أى كانت أيه هى بقى .. المهم تستمتع بكل لحظة بتعدى عليك، مش عشان هى أخر لحظة، بس عشان هى فرصة إنك تعمل فيها حاجات كتير و حرام تضيعها.
هو الإنسان ايه غير راحة و إستجمام و شوية حاجات فوق بعض .. !!!
