نقطة و من أول السطر

طبعا أكيد مؤكد أنا مش هفتى فى السياسة و فى أحوال البلد و النظام و كل الكلام ده..

انا بس عايزة اتكلم عن اللى حصل امبارح، أنا متأكدة مليون فى المية إن اللى نزلوا امبارح دول "مش" مسيحين .. بكل بساطة هعيد نفس الكلام اللى بنقوله كل مرة و المعروف اصلا، احنا طول عمرنا بنحب بعض و بنخاف على بعض و صحاب و جيران و حبايب و زى الفل،و عمرنا ما شتمنا فى بعض و لا ضربنا بعض ولا حتى اتخنقنا مع بعض .. أحنا أكيد بنتخانق "بس بنتخانق لـ بعض مش مع بعض" و الفرق واضح. ده أحنا كنا عايشين مع اليهود زمان!!!

ده كلام بجد و مش كلام اغانى و افلام .. و كل واحد لو فكر شوية فى حياته اليومية كدة هيلاقى ان معظم الناس المحترمين اوى مسيحين، اه بجد والله فعلاً الحمد لله أحنا مافيش بينا اى مشاكل.

أما بالنسبة للمهذلة اللى حصلت امبارح دى..

أولا أنا لا ثورجية ولا من بتوع الميدان ولا الكلام الكتير ده، أنا واحدة عادية جدا و أقل كمان من العادى بس بحب مصر أكتر من العادى .. بلدى و بحبها و بخاف على ناسها و على حالها..

أظن كان واضح التشابه الرهيـــــــب بين تصرفات "ألترس الأهلى" و البلطجية اللى نزلوا إمبارح اللى مفهمين الناس انهم مسيحين!!!!!!!!!!!!!!!!!!!

أيوة اللى نزلوا من رابع المستحيلات إنهم يكونوا مسيحين، أعتقد إنهم "فلول زفت نظام" و كل هدفهم تحصل فتنة طائفية محترمة عشان تولع فى الدنيا كلها و البلد تقوم ماتعدش!!!!

أرجو بجد تكون الناس "المصرييـــــــــــــــــن" و تحتيها مليون خط، يفكروا كويس أوى و يعقلوا المشاهد التى تخرجها فلول النظام لتصنع فيلم درامى محترم كل مشاهده حرق سيارات، ملوتوف، 100 مصاب أو أكثر و قتلى و مصابين فى المستشفيات يسبون و يلعنون فى الأقباط، و هم مجرد بلطجية أعتقد إنهم بلا دين ولا ينتمون لأى ملة، هم فقط مخربون و هادمون لكل من يضع طوبة فى بناء مصر جديدة محترمة و عظيمة ليس فقط بتاريخها و لكن بمستقبلها ايضاً.

أنا حاسة إننا ماخلعناش مبارك من كرسى الحكم، إحنا قومناه شوية عدلناله الكرسى و قعد تانى!!

يا ريت الجمعة الجاية تكون جمعة حاسمة و تكذب كل من نزل يخرب فى البلاد تحت إسم المسيحين، حرام نقع فى بعض، بجد حرام!

لو أفترضنا إن اللى نزل امبارح مسيحين، ايه هتكون مصلحتهم إنهم يقفلوا الشوارع و يولعوا فى العربيات!!!! 

فى رأيى المتواضع البسيط ان ده مجرد "سيستم" أى نظام، للبلطجة و التخريب و زرع الخوف و نشر الفتنة ليس أكثر!! لا تقولى مسيحيى و قبطى و مسلم و أخوانى و الرغى الكتير ده..

هما هما اللى نزلوا تحت أسم الألترس هما اللى نزلوا أمبارح تحت أسم المسيحين.

و أخيراً عشان أنا دمى أتحرق، بلاش نصدق كدة كل حاجة و خصوصاً لو فى المناطق الحساسة دى، اللى ممكن تقوم البلد و ماتعدش ..

 يا ساااااااتر .. أيه ده!!! أيه شغل اليهود ده!! و زى ما قال الأبنودى " لسة النظام ماسقطش! "

أنا خايفة بجد نكون بنلف فى دايرة مقفولة، و خايفة نعيد من الأول .. إمبارح لاقيت نفسى فجأة بقول "نقطة و من أول السطر .. الشــــــــــعـــــــــــب يــــــــــــريـــــــــــــد إســــــــــــــــقاط النـــــــــــــــــــظام"