مافيش إسم..عشان أصلاً مش عارفة أكتب عن أيه!!
فى حاجات كتير خنقانى و تعبانى
بس مش هو ده اللى أنا عايزة أكتب فيه
نفسى أكتب حاجة فيها حب و أمل و تفائل
بس ماعنديش ولا كلمة حلوة..
ولا أى حاجة فيها تفائل
حتى الحقيقة لازم يبقى عايش جواها كدبة
و الحاجة الحلوة دايماً جواها حاجة وحشة
دايماً فى نهايتها طعم مُر
طعم بيخلى السنين تعدى بينا بسرعة و تمُر
بس برضو مش هو ده اللى أنا عايزة أكتب فيه
زهقت من كتر البكى و الهموم و النكد اللى عايشين فيه
نفسى أمسك مرة صورة..و ألاقى الضحكة طالعة من القلب
ألاقى كدة الوشوش مبتسمة و كلها حب!!
لكن أبداً...مافيش ..حتى الضحكة بقت تمثيل و كدب!
برضو ألف و أدور و أرجع لنفس المكان
أقول مش هاكتب تانى عن الأحزان
أقول أكتب عن الفرحة أو حتى عن قصة حياة فنان!!!
لكن فجأة ألاقينى رجعت كئيبة زى زمان
مش مشكلة هحاول تانى...
أنا فاكرة زمان..و أنا فى إبتدائى..
كان زميلى الحلو ده! دايماً يجيى و يترجانى
و يقولى تعالى نلعب مع بعض تانى!
و غصب عنى كبر جوايا حب ليه...
بس هو غصب عنه كبر..و غيرت الدنيا فيه!
و بعد ماكان بيحبنى فجأة لاقيته بينسانى
و بيتلخبط فى إسمى..و بينسى عيد ميلادى
حتى عشرة العمر..و زمالة الإبتدائى
فجأة كدة بتروح فى لحظات..فى ثوانى!!
شوفتوا..! غصب عنى رجعت لنفس المكان
معلش استحملونى...أصل أنا قلبى مليــان
بكى و هموم و دموع و أحـــــــــــــــــــــزان
يلا مش مشكلة...هحاول مرة كمـــــــــان..
زماااااان بنت عمى دى كانت جارتى
مش بس بنت عمى...دى كانت أكتر من أختى
كنا صحاب أوى...رغم إنها أصغر منى
يمكن ساعات من خوفى عليها..كنت بحس إنها بنتى!
كل اللى يشوفنا يقول دى بنت و أمها
و مهما كانت بتعمل فيا..عمر مافكرت أضرها
دايماً حاسة إننا واحد..و إن دمى دمها..
بجد دى كانت أحلى فترة عيشتها!
ماهى زى بنتى و مستحيل أستغنى عنها
بس هى تقدر...!!
هى تقدر تستغنى عنى..و تقدر كمان تخونى!
و تقدر تاخد منى..حبيبى و كل عمرى!!!
فجأة لاقيت نفسى بتخدع فى أتنين..
كل واحد منهم كان عايش بوشين!
حتى القريب منى خلاص بقى بعيد
و أدينى حزنت تانى من جــــديد..!!
بجد مش لاقية وصف ولا إسم لـ انا حاسة بيه
مش عارفة أعيش عمرى ولا عارفة أستمتع بيه
بس فى نفس الوقت بضحك و باقول الدنيا حلوة و جميلة
مع إنى كدابة أوى و كل ده مش حقيقة!
أمتى بقى نقدر نحول الشوك لـ ورود..
و نرسم طريق لفرحنا...و مانرسملوش حدود
نسيبه طاير فى السما..يمكن يوم نطير مع العصافير!
و تتوه همومنا عننا...و أحنا نفضل نطيــــــــــر نطيــر
لغاية مانوصل على أى بحر كبير...
و ننزل نغسل زنوبنا...ننزل ندَوب همومنا
يمكن ترجعلنا الروح من تانى..
و يرجعلنا تانى الأحساس
يمكن ألاقى إسم لـ إحساسى..
يمكن أفهم وشوش الناس
ااااه من وشوش الناس! وشوش غدر الزمن
هما يغدورا.. و أحنا إللى ندفع التمن!!
زمن كله شياطين..محسوبين غلط على البنى أدمين!
أحنا بنموت و بنقل...و دول لسة عايشــــــــــين!!
يبقى إسمه أيه ده يا ناس..إاللى إحنا عايشين فيه
حتى أحاسيسنا ملهاش إسم تتسمى بيه!!
عشان كدة مافيش إسم...!
مافيش إسم..عشان أصلاً مش عارفة أكتب عن إيه!
ليست هناك تعليقات:
إرسال تعليق